Ovttaveardásašvuođaáittardeaddji bivddii Anár gielddas čilgehusa sámegielat dulkoma ordnemis gieldda váldostivrra čoahkkimiin. Dán dat dagai dan geažil go váldostivrra lahttu Pirita Näkkäläjärvi (ruonát) lei áššiin oktavuođas áittardeaddjái.
Anár gielddaráđđehus gieđahalai ášši čoahkkimisttis vuossárgga 21.2. ja attii viđasiidosaš čilgehusa ovttaveardásašvuođaáittardeaddjái.
Čoahkkimiid dulkongažaldahkii gielddaráđđehus vástidii, ahte gielda čuovvu hálddahusnjuolggadusas 154 paragráfa, man mielde gieldda čoahkkimiin dušše sámegielat sáhkavuorut dulkojuvvojit suomagillii. Dasa maŋŋálasdulkon lea beaktilamos vuohki ja heive dálá dilis buoremusat dulkoma ordnemii.
Gažaldahkii das maid Anár gielda lea dahkan ovttaveardásašvuođa ollašuvvama ovdii vástida gielddaráđđehus, ahte Anár gielda lea ovddidan luohttámušolbmuid ovttaveardásašvuođa go lea ordnen gieldda čoahkkimiidda dulkoma sámegielas suomagillii dalle jus luohttámušolmmoš lea ovddalgihte almmuhan iežas hállát čoahkkimis sámegiela.
Dainna go lea lasihan dulkoma guoskevaš paragráfa hálddahusnjuolggadussii, geahččá Anár gielda iežas ovddidan ovttaveardásašvuođa.
Gielda goittot áigu čuovvut dili ja dárbbu mielde buoridit doaibmavugiid dulkoma ordnemis, vástida gielddaráđđehus ovttaveardásašvuođaáittardeaddjái.
Gažaldat lea das man munnádit gielddat ollašuhttet sámi giellalága
Anár gieldda váldostivra gieđahalai 23.9.2021 čoahkkimis gieldda hálddahusnjuolggadusa nuppástuhttima, mas lei fárus maiddái sámegielat dulkon. Mearrádussan dulkomis šattai gielddaráđđehusa evttohusa mielde dat ahte gieldda čoahkkimat dulkojuvvojit dušše sámegielas suomagillii.
Pirita Näkkäläjärvi evttohii dalle, ahte goittot váldostivrra čoahkkimiin dulkon livčče maiddái suomagielas sámegillii. Jienasteamis gielddaráđđehusa evttohus vuittii jienaiguin 21–5. Dan mearrádussii Näkkäläjärvi guđii sierra oaivila.
Dulkonáššis váldostivrra lahttu Pirita Näkkäläjärvi lei oktavuođas ovttaveardásašvuođa eiseváldái danin go sus lea sámi giellalága vuođul vuoigatvuohta geavahit sámegiela earret eará gieldda čoahkkimiin.
Son doaimmai nu mo gieldda ovttaveardásašvuođa- ja dásseárvoplánas gielda ávžžuha dahkat go olmmoš atná iežas olgguštuvvon giela geažil.
Ovttaveardásašvuođaáittardeaddji lea iehčanas eiseváldi man bargun lea gohcit ovttaveardásašvuođalága ollašuvvama Suomas.
Yle Ođđasiid Sámis ja Beaivvi ságaid sáhtát maid guldalit Yle Areenas.
