Ođđasat fievrredansuorggi streaikka birra leat dagahan Anára bensenstašuvnnas hušša.
Boaldámušvátnivuohta sáhttá juo boahtte vahkus dihttot Suoma bensenstašuvnnain, juos biila- ja fievrredansuorggi ámmátlihttu AKT streaikkat ollašuvvet. Streaikkat giddejit hápmaniid gálvojohtolaga ja sáhttet hehttet maiddái boaldámušaid doaimmaheame bensinstašuvnnaide.
Anára Neste-bensenstašuvnna fitnodatdoalli Mikko Pirkola muitala, ahte olbmot leat dál oastigoahtán boaldámuša. Ikte duorastaga bensenstašuvdna jođihii 50 proseantta eanet boaldámuša go dábálaččat.
– Dan gal fuobmá, go olbmot bohtet lihtiiguin viežžat boaldámuša, muitala Pirkola.
Dálá boaldámušvuorkkáin birgejit boahtte vahku beallái
Streaikka váikkuhusaid boaldámušfievrredemiide oaidná easka dalle, go streaika álgá. Ná lea boaldámušbuvttadeaddji Neste almmuhan fitnodatdoalli Mikko Pirkolai.
– Háliidan jáhkkit, ahte oaččun boaldámuša boahtte vahkus vel lasi. Lean goit diŋgojumi dahkan ja jáhkán, ahte boahtte vahkus gal boaldámuš vel johtá.
Dálá boaldámušvuorkkáin Anáris birgejit boahtte vahku beallái.
– Boahtte vahku loahpa bealde galggašii oažžut de lasi. Sáhtán dušše sávvat, ahte lasi boahtá.
Fitnodatdoalli lea fuolas boaldámuša lassin maiddái gálvofievrredemiin. Jus biebmofievrredeamit bisánit, de bensenstašuvnna restoráŋŋas maid fálaldat unnu.
– In leat fitnodatdoallin gal nu beare movtta dáin streaikkain. Gal dat dagaha fuola. Muhto ii gánnet beare olu ovddalgihtii moraštit, áigi čájeha mo dat manná, dadjá Mikko Pirkola.
Gávpejas ii moraš, vaikko muhtun gálvu sáhttá nohkat
Gáregasnjárgga gávpejas Hans-Niiles Tapiola muitala, ahte ođđasat streaikka birra gal eai vel oidno motge sin gilis.
– In dieđe mot dat boahtá váikkuhit. Eai leat olbmot dan birra oba hállange, dadjá Tapiola.
Tapiola gal ii leat nu fuolas das, ahte boaldámuš nogašii.
– Jus dan ii fidne, de dan ii dalle fidne. Ferte de birget. Mun jáhkán dat gal reahkká mus.
Streaika goit sáhttá oidnot gávppi hilduin aŋkke dakkár gálvvuid buohta, mat bohtet olgoriikkain.
– Muhtun gálvu sáhttá nohkat, muhto gal mun jáhkán, ahte mii birget áibba bures ja borramuš gal gávdno, árvala Hans-Niiles Tapiola.
Plánejuvvon streaikkat álget Suoma ámmátlihtuid guovddášorganisašuvdna SAK almmuhusa mielde njukčamánu 11. beaivve ja bistet sullii guokte vahku.
