• دعاء أبو الضياء
• 08:40 صباحًا - 8 يونيو 2025
• نقد آخر لنفس المستخدم

فيلم "سيكو سيكو" وصلنا كعمل كوميدي شبابي يبدو وكأنه محتار في هويته، مش عارف هو عايز يكون فيلم شباب مليان طاقة، ولا كوميديا ذكية، ولا تجربة جريئة تترك أثر. النتيجة النهائية؟ شوية إفيهات متناثرة، مواقف سطحية، ومحاولة متعثرة لكسر الملل... بس للأسف، المحاولة دي وقعت في نفس الفراغ اللي الفيلم عايز يملأه. الفيلم بيحاول يحكي قصة شحنة مخدرات توصل لأبناء عم بالخطأ عن طريق الخطأ قدرت تجمعهم تاني بعد ما كان في عداوة غير ظاهرة بينهم أو بلاش نقول عداوة كره متبادل، وده كان ممكن يطلع منه عمل درامي أو حتى كوميدي ناجح لو اتعمل بعقل وترتيب. لكن سيكو سيكو بيتعامل مع القصة كأنها مجرد لعبة فيديو بلا قواعد واضحة. المشاهد بتتنقل بشكل متقطع كأنها مجموعة اسكتشات متصلة بسلك، كل مشهد بيقفز على اللي بعده من غير روح أو معنى. الكوميديا مش بتطلع من المواقف نفسها، لكن من نكتة بتتقال كأنها ضغطة زر — المطلوب منك تضحك بسرعة قبل ما تبدأ تفكر وتلاحظ فراغ الحبكة. الممثلين الشباب واضح إن عندهم شغف وحضور، خصوصًا عصام عمر اللي بيحاول يضيف طاقة، وطه دسوقي اللي بيظهر بحماس ملحوظ. لكن المشكلة مش في الأداء، بل في النص اللي مش قادر يعطيهم مساحة حقيقية يتنفسوا فيها أو يخلقوا شخصية واضحة. أما بالنسبة لباسم سمرة، فهو بيحاول يحافظ على جدية دور كان ممكن يكون له وزن، لكن السيناريو ضيّع فرصته. وبالنسبة للمرأة في الفيلم؟ وجودها مجرد ديكور، ظل في الخلفية، بلا صوت ولا تأثير. المؤسف أن الفيلم ما استغلش الفرصة ليبرز شخصية نسائية لها حضور أو طموح، وخلاها مجرد إضافة تجميلية، زي دور تارا عماد، معرفش ليه أصلا أتعمل وبيضيف ايه، حتى دور ديانا هشام مهمش لمجرد إنه اتحط عشان يظهر شخصية سليم الضعيفة وعشان حبة الكوميديا مع باسم سمرة. الإخراج يميل للحركة السريعة والقطع المتكرر، مما يجعل الفيلم أقرب لفيديوهات السوشيال ميديا أو عروض اليوتيوب الطويلة، بعيد كل البعد عن عمل سينمائي له هوية وبالرغم أن مدته قاربت الساعتين وأكتر. الموسيقى حاضرة كخلفية فقط، من غير ما تعبر عن مشاعر أو تدعم اللحظات، مما يزيد من برودة الفيلم، حتى في لحظاته اللي كان المفروض تكون مشحونة أو مؤثرة. سيكو سيكو يعاني من فقدان الهوية، يتأرجح بين كونه فيلم شباب، كوميدي، أو تجربة جديدة، لكنه ما بيقدرش يستقر على أي واحد منهم. النهاية: خليط مرتبك من الإفيهات المبعثرة والمواقف اللي بتتقال بسرعة، كأن صانع الفيلم بيخاف من السكون أو الوقوف

تقييم شخصي: 3.5/10 فيلم سطحي، بيستخدم كوميديا سطحية، وقصة مهملة، مع أداء تمثيلي جيد لكن محتاج دعم أكبر من سيناريو قوي وإخراج أكثر عمقًا.

• 6 مفيد
• 3 غير مفيد