Denne veka har eg vore på Hamar saman med minstemann på tre år og systra mi. Dei to døtrene til systra mi var også med, men dei budde på ein skule og var opptekne kvar dag på Tusse Handballskule i Vikingskipet.

Det har blitt lite blogging i det siste, men slik blir det kanskje om sommaren? Det er så mykje som skjer på denne tida. Men no har eg sommarferie heilt til 15. august, så då blir det nok litt meir tid til handarbeid vil eg tru!

Dette settet som består av jakke og hue, strikka eg i fjor haust/vinter til ein då ufødt baby. Settet skulle mora mi gje i gåve. Babyen viste seg å bli ein flott gut. Her er han eit par månader og allereie ein samfunnsinteressert gut som studerer dagens avis!
Eg er visst hekta på bølger, for også denne jakka er i bølgemønster!
Mønster og garn er Bambino frå Idena.

Kjøpte desse to kjempefine engelske strikkebøkene til meg sjølv i bursdagsgåve!!

Boka til venstre inneheld 25 klassiske strømpemønster.

Boka til høgre er oppfølgaren til ei strømpebok (som eg sjølvsagt har). Ho har mønster på både fleirfarga sokkar med mønsterborder og
einsfarga mønsterstrikka sokkar.

Juni hittil har vore heilt topp! Måtte det berre fortsette sånn!

Bølgeteppet mitt er blitt for stort til å drakse med seg rundt om kring. Orkar knapt å ta det med ut i hagen....Eg har difor begynt å hekle oldemorsruter i restegarnet frå bølge(reste)teppet!
Skal ha ein omgang med naturkvitt rundt alle rutene før dei blir sydd saman, trur eg!
Det skal bli ei pute til bølgeteppet! Får sjå kor mange lappar eg endar opp med!

I kveld var det sommaravslutning i Nordfjord Lappe- og Quilteklubb. Eg var på ein annan avslutning fyrst, så eg fekk berre med meg siste delen av arrangementet. Det er blitt tradsjon å arrangere sesongavslutninga i Jektehola, som er eit veldig fint friområde omkransa av blant anna mange tre. Dei som har noko å vise fram tek det med slik at det kan hengast opp på snorene som er knytt opp mellom trea! Elles er det grilling, kaffidrikking, loddsal og prating det går i!

Det var veldig mykje fint å sjå i kveld! Eg jobbar saman med to damer som er litt meir aktive ved symaskina enn meg. Her er det dei hadde med til utstillinga!

Heimbygda mi fotografert frå ca. 300 m over havet.
Ein liten trimtur i kveld til Ossetra, som etter mi meining er den flottaste setra i Eid kommune!

I dag har det vore ein fantastisk fin og varm dag, og varmare skal det visst bli!
Har fotografert litt frå hagen.

Dette er eit Japansk epletre, og det står i full blomst no! Veldig fint, så lenge det varer!