kahikatea – Store norske leksikon

Kahikatea er eit stort, eviggrønt bartre i gultrefamilien. Frukta frå treet kan etast. Frukta blir sanka frå viltveksende tre og blir berre konsumert lokalt. Frukta har ikkje fått noko norsk namn.

Faktaboks

Etymologi

kahikatea er eit maorisk ord samansett av kahika = malayeple-tre og tea = kvit. Treslaget har lys (kvit) ved.

Dacrycarpus kjem av gresk dakryon (δάκρυον) = tåre og karpos (καρπός) = frukt.

dacrydioides = som liknar artar i slekta Dacrydium.

Også kjend som

white pine (engelsk), New Zealand dacryberry (engelsk)

Vitskapeleg namn

Dacrycarpus dacrydioides

Beskriven av

(Achille Richard) D. J. de Laubenfels

Opphavsstad

New Zealand

Skildring

Kahikateatreet blir opptil 50 meter høgt. Blada er smale, spisse og stive. Frøa er blåsvarte og sit på ein raudoransje, oppsvulma stilk eller hjelpefrukt. Det er denne hjelpefrukta som kan etast.

Utbreiing

Treet høyrer heime på New Zealand.

Tillaging og smak

Smaken av kahikatea er søt og nokså tam, men med eit hint av kvae. Frukta kan etast som ho er, eller brukast til å smaksetje likør, øl, leskedrikkar, konfekt og dessertar.

Annan bruk

Maorifolket har tradisjonelt mange bruksområde for treet: Fruktene blei brukt spesielt ved høgtider og festar, og kvaa blei toggen som tyggegummi. Frå oska av brent ved blei det vunne ut fargestoff til tatoveringar, og treverket blei brukt til reiskapar.

Les meir i Store norske leksikon

Faktaboks

Vitskapeleg namn: Dacrycarpus dacrydioides
Tidlegare vitskapleg namn: Podocarpus dacrydioides Achille Richard, Dacrydium excelsum D.Don
Encyclopedia of Life-ID: 1033665
GBIF-ID: 2687859

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må vere logga inn for å kommentere.

Fagansvarleg for Bartrær

Egil Ingvar Aune

Amanuensis em. i vegetasjonsøkologi, NTNU – Norges teknisk-naturvitenskapelige universitet