Innlandet

Innlandet fylkeskommune styrer lokale oppgåver som vidaregåande skular, kollektivtransport og kultur.

Fylkeshuset ligg på Hamar. Fylkesordføraren er den øvste folkevalde leiaren i fylkeskommunen. Arbeidarpartiet vart det største politiske partiet i Innlandet under kommunestyre- og fylkestingsvalet i 2023.

Sjukehuset Innlandet HF i Lillehammer er det største sjukehuset i fylket. Sjukehuset har mellom anna avdelingar i Hamar, Elverum, Tynset og Gjøvik.

Mange menneske i fylket jobbar med helse, utdanning, jordbruk og turisme. Innlandet er fylket med mest jordbruk i Noreg. Fleire stader i Innlandet bur det samar som driv med reindrift.

Rundt 7 prosent av befolkninga i Noreg bur i fylket. 60 prosent bur i byar og tettstader. Dei siste tiåra har mange menneske flytta til byane som ligg ved innsjøen Mjøsa.

Rundt 90 prosent har bokmål som hovudspråk i grunnskulen, medan 10 prosent har nynorsk som hovudspråk. Det er mange vidaregåande skular og fleire folkehøgskular i fylket. Universitetet i Innlandet har fleire avdelingar i fylket.

Jotunheimen, Rondane og Femundsmarka er populære reisemål for turistar. Norsk skogmuseum og Maihaugen er òg populære turistmål.

Innlandet er det einaste fylket i Noreg som ikkje ligg ved kysten.

Fylket består av mykje skog, innsjøar, elvar og mange dalar og bratte fjellområde. Det er 11 nasjonalparkar i fylket.

I Jotunheimen ligg Noregs høgaste fjell, Galdhøpiggen. Noregs største innsjø, Mjøsa, ligg òg i fylket.

Det lever mellom anna elg, hjort, villrein, rev, gaupe, bever og hare i fylket. I innsjøane finst det aure, gjedde og åbor.

Innlandet har kalde vintrar og milde sumrar. Om vinteren kjem det mykje snø mange stader i fylket. Det er fleire vasskraftverk og vindkraftverk i Innlandet.

Innlandet fylke vart grunnlagt 1. januar 2020 etter at fylka Oppland og Hedmark vart slått saman.

Fylkesvåpenet er eit skjold med tre liner i kvitt på grøn bakgrunn. Det symboliserer vatn, fjell og tretoppar.

• fylke
• fylkeskommune
• kommune
• Austlandet