[go: up one dir, main page]
Foto utsnitt av Warholm på vei over et hinder, Mägi er bak ham til venstre, Samba bak ham til høyre.
Karsten Warholm vann dette løpet på 400 meter hekk i Polen. Mägi kom på 6. plass og Samba på 3. plass. Av /NTB. Avgrensa gjenbruk

Karsten Warholm

Foto av Warholm som ser overrasket og glad ut med åpen munn. Han holder begge hendene opp mot hodet.

Karsten Warholm rett etter at han vann finalen på 400 meter hekk i OL i Tokyo i 2021.

/NTB.
Lisens: Avgrensa gjenbruk

Karsten Warholm er ein norsk friidrettsutøvar frå Ulsteinvik i Møre og Romsdal fylke. Han er ein av dei beste løparane i verda på 400 meter hekk.

Warholm har vunne både OL-gull, VM-gull og EM-gull. Han har også verdsrekorden på 400 hekk. I 2021 vart han den fyrste frå Noreg som vart kåra til Årets mannlege friidrettsutøvar i verda av Det internasjonale friidrettsforbundet. Warholm bur og trenar i Oslo. Han konkurrerer framleis for klubben han starta i som barn. Klubben heiter Dimna IL og held til nær Ulsteinvik i Ulstein kommune.

Bakgrunn

Warholm byrja med friidrett då han var 7 år. Han dreiv med mange ulike friidrettsøvingar i fleire år og spelte i tillegg fotball fram til han var 15 år.

Som ungdom og junior konkurrerte han i mangekamp, som består av fleire ulike friidrettsøvingar. Han konkurrerte også i fleire enkeltøvingar.

I 2013 vart han verdsmeister i åttekamp i VM for utøvarar som er 18 år eller yngre (U18). To år seinare tok han sølv i junior-EM både på 400 meter og i tikamp.

Hausten 2015 fekk Warholm Leif Olav Alnes som trenar og byrja etter kvart å satse meir på 400 meter hekk.

Karriere

OL i Rio de Janeiro i Brasil 2016 var Warholms fyrste OL. Då var han 20 år. Han sette norsk rekord og kom til semifinalen på 400 meter hekk. Same år kom han på 6. plass i EM og sette norsk rekord på 400 meter.

Warholm fekk det internasjonale gjennombrotet sitt i 2017. Då vart han verdsmeister på 400 meter hekk under VM i London i Storbritannia. Han var den fyrste personen frå Noreg som vart verdsmeister i eit baneløp.

I 2019 vart Warholm igjen verdsmeister på 400 meter hekk. Det var i Doha i Qatar. Han vart den fyrste norske friidrettsutøvaren som har vunne gull i to VM på rad. I 2021 vann han OL-gull på 400 meter hekk i Tokyo i Japan. I det løpet sette han ny verdsrekord med tida 45,94 (45 sekund og 94 hundredelar).

Under VM i Budapest i Ungarn i 2023 vann han det tredje VM-gullet sitt på 400 meter hekk. Året etter vann han sitt tredje EM-gull på rad i Roma i Italia. I OL i Paris i Frankrike i 2024 kom han på andre plass.

Beste resultat

  • OL-gull: 400 meter hekk i 2021
  • 3 VM-gull: 400 meter hekk i 2017, 2019 og 2023
  • 3 EM-gull: 400 meter hekk i 2018, 2022 og 2024
  • Verdsrekord 400 meter hekk i 2021 (45,94)

I tillegg har Warholm vunne mange NM-gull. Dei fleste på 400 meter hekk, men også i øvingar som 400 meter og lengde.

Les meir i Vesle norske leksikon

Faktasjekk av

Jørn Sundby