One Battle After Another (The Battle of Baktan Cross/ Desert Highway/ BC Project)  (2025)  معركة تلو الأخرى

أراء حرة

 [1 نقد]

One Battle After Another.. ثورة داخلية بمذاق سينمائي ثقيل

• دعاء أبو الضياء
• 09:31 مساءً - 9 اكتوبر 2025
• نقد آخر لنفس المستخدم

أوقات كتير بندخل فيلم وإحنا مش عارفين هنتعلق بيه ولا لأ، خصوصًا لما يكون فيلم سياسي أو بيتكلم عن ثورة أو أفكار أيدولوجية، وفيلم One Battle After Another هو واحد من النوع ده، اللي بيبان في الأول إنه فيلم تقيل أو حتى معقد، لكن مع الوقت بيكشف عن طبقات إنسانية عميقة جدًا، بتخلينا نعيش الصراع مش بس في الشارع، لكن جواه كل شخصية. الفيلم مش لكل الناس، وده مش عيب، لكن اللي هيصبر ويدخل جواه شوية، هيلاقي تجربة مختلفة، تجربة فيها تمثيل استثنائي، إخراج عبقري، ورحلة بين الألم، الفقد، والتمسك بآخر خيط من...اقرأ المزيد الأمل. وبصراحة مش هتكلم كتير عن القصة نفسها، لأن النوعية دي من الأفلام اللي بتتناول الثورات والسياسة اليسارية دايمًا بيكون ليها رؤى وتأويلات كتير، وممكن ناس تختلف أو تتفق عليها حسب خلفيتهم أو وجهة نظرهم. إنما نقدر نقول إن النص كان متماسك ومقنع، ومفيش حاجة حسيتها خرجت عن السياق أو مش مفهومة. اللي فعلاً لفت نظري وكان قلب الفيلم هو أداء ليوناردو دي كابريو، مبدع كعادته، بس اللي ميز أداءه هنا هو النضج… الشخصية اللي لعبها كانت في مرحلة صعبة: أب، كبير في السن، ومدمن، وحاسس إنه فقد كل حاجة، بس لما بنتُه تكون في خطر، فجأة بنشوف فيه الشرارة القديمة، روح الثورة اللي كان فاكر إنها انطفأت، وده اتنقل بشكل إنساني ومؤثر جدًا. لكن المفاجأة الحقيقية بالنسبة لي كانت شون بين، امن أول ظهور له حسيت إن فيه تقيل جاي، فيه شخصية مش هتعدي مرور الكرام، وده فعلًا اللي حصل، مشهد ورا التاني، كان حضوره دايمًا بيشد العين، حتى لو مش بيتكلم، الراجل ده بيعرف يمثل بعينيه، بملامحه، بطريقة سكوته قبل كلامه، بصراحة، أعتقد ده من أقوى أدوار شون بين في آخر عشر سنين، ولو الأكاديمية فعلاً عايزة تكرم أداء حقيقي، مش بس اسم كبير، فهو يستحق يترشح للأوسكار السنة دي عن الدور ده، وأكتر من كده، يستحق يكسب كمان. كمان تشيز إنفنتي، اللي كانت قدمت قبل كده دور بنت جاك جيلينهال في Presumed Innocent، كانت إضافة جميلة هنا، أدت دور البنت بشكل بسيط بس مؤثر، وحسيت إنها قدرت توصل مشاعر معقدة من غير ما تبالغ. من الناحية البصرية، الفيلم كان رائع، التصوير الخارجي تحديدًا كان عبقري، وكل كادر فيه تفاصيل بتخدم الحالة النفسية للشخصيات، المونتاج والموسيقى كانوا بيكملوا بعض، وكل حاجة كانت في مكانها. وبرجع وأقول، بول توماس أندرسون كل مرة بيأكد إنه مخرج استثنائي، عارف هو بيعمل إيه، وبيخلي الممثلين يطلعوا أفضل ما عندهم. ويمكن الحاجة الوحيدة اللي ممكن تؤخذ على الفيلم هي طوله المبالغ فيه، كان ممكن يختصر نص ساعة مثلًا ومش هيفرق، بالعكس كان هيخلي الإيقاع أفضل. في النهاية، One Battle After Another مش فيلم سهل، ومش معمول علشان يرضي كل الأذواق، بس هو من النوع اللي بيفضل في بالك بعد ما تخلصه. يمكن عشان شخصياته حقيقية، أو عشان التمثيل فيه كان من العيار الثقيل، أو ببساطة عشان فيه شوية صدق وسط دوشة كتير حوالينا.

• 0 مفيد
• 0 غير مفيد

أضف نقد جديد